Ши Жиньпиний авлигын эсрэг кампанит ажлыг гардан зохион байгуулагч тушаал дэвшжээ

Хятадын цэргийн дээд шатлалд үлдсэн цорын ганц генерал Жан Шэнмин улс орныг удирддаг, Коммунист Намын 20 орчим өндөр албан тушаалтнаас бүрдсэн цөөн тооны бүлэг болох Улс төрийн товчооны гишүүнээр дэвшин томилогджээ.

Энэ бол даруухан гарал үүслээсээ өндийж, Ерөнхийлөгч Ши Жиньпиний арван жилийн турш үргэлжилсэн авлигын эсрэг аяныг чимээгүйхэн гардан зохион байгуулсаар ирсэн юм.

Жан 19 настайдаа буюу 1978 онд Ардын чөлөөлөх армид элсчээ. Энэ бол Хятад улс Соёлын хувьсгалын үймээн самуунаас ангижирч, дэлхий ертөнцөд нээлттэй болж эхэлж байсан үе байв. Түүний дүр төрх мэдээгээр олонтаа гардаг ч, дуу хоолой нь бараг сонсогддоггүй нэгэн билээ. Жан бол зэвсэгт хүчнийг удирдан чиглүүлдэг, Ерөнхийлөгч Ши Жиньпин өөрөө тэргүүлдэг Төв цэргийн зөвлөлийн (ТЦЗ) дэд дарга юм. Тэрбээр 2017 оноос энэ оны 7 дугаар сар хүртэл ТЦЗ-ийн Сахилга бат, хяналтын комиссыг тэргүүлж байсан бөгөөд тус байгууллага нь арми доторх авлигын эсрэг ажлыг хариуцдаг байв.

Түүний удирдлага дор урьд өмнө байгаагүй олон өндөр албан тушаалтан, цэргийн дарга нар албан тушаалаасаа чөлөөлөгдсөн байна. Үүний улмаас долоон гишүүнтэй уг комисст одоо зөвхөн Жан, Ши Жиньпин хоёр л үлджээ.

Ши Жиньпиний хэлснээр, Хятадын зэвсэгт хүчинд албан тушаал дэвшүүлэх, техник хэрэгслийн гэрээ хэлэлцээр, төсөв санхүүтэй холбоотой авлигын олон дуулиан дэгдсэн нь тус хүчний үйл ажиллагаа болон шинэчлэлд саад учруулж байна. Ши Жиньпин 2023 онд гурав дахь бүрэн эрхийн хугацаагаа эхлүүлснээс хойш албан тушаалаасаа буусан томоохон зүтгэлтнүүдийн дунд Батлан ​​хамгаалахын сайд асан Вэй Фэнхэ, Ли Шанфу, Хятадын хамгийн нөлөө бүхий генерал гэгдэж байсан Жан Юушя нар багтаж байна.

Сингапурын Наньян Технологийн Их Сургуулийн Хятадын армийн асуудал хариуцсан шинжээч Жэймс Чар зэвсэгт хүчин дэх Ши Жиньпиний "гар хөл" болсон Жан Шэнминий хийсэн ажлын үр дүн нь  Хятадын армид гурван одтой генерал тун цөөхөн үлдсэнээс тодорхой харагдаж байна гэжээ.

https://www.msn.com/en-xl/news/other/zhang-shengmin-xi-s-lone-hatchet-man-at-the-top-of-china-s-military/ar-AA2gv5Vr?ocid=hpmsn&cvid=6ae805b06dae4f038720fb1113c4ce22&ei=16