Ши Жиньпин намын доторх “ноцтой далд аюул”-уудыг цэвэрлэх ажлын хүрээнд 33 албан тушаалтныг албан тушаалаас нь “зайлуулжээ”

Ши Жиньпин Хятадын Коммунист Намын (ХКН) доторх "далд аюул"-уудыг цэвэрлэх аяны хүрээнд урьд өмнө байгаагүй олон тооны албан тушаалтныг албан тушаалаас нь “зайлуулжээ”. Хятадын төрийн тэргүүн төрийн эрх мэдлээ бэхжүүлж буй энэ үед нийт 33 гишүүн, түүний дотор цэргийн салбарын 16 албан тушаалтан эгнээнээс хасагджээ. Бээжингийн хамгийн өндөр цолтой генерал Жан Юушя авлигын хэрэгт холбогдуулан олон сарын турш явуулсан мөрдөн шалгах ажиллагааны дараа албан тушаалаасаа чөлөөлөгдсөн байна.

Шинжаан бүсийн намын нарийн бичгийн дарга асан Ма Шинруйг авлигын хэрэгт, тухайлбал, танил тал, хамаатан саднаа албан тушаалд томилох, хахууль авах, зэрэг асуудалд холбогдуулан албан тушаалаас нь мөн огцруулжээ. Намын сахилга батыг хянан шалгах төв хорооны (CCDI) дэд нарийн бичгийн дарга Жан Фухай "Нөхөр Ши Жиньпинийг цөм болгосон Төв хороо нь нам, төр, армийн доторх ноцтой далд аюулуудыг арилгасан" гэжээ.

Тэрбээр хэвлэлийн бага хурлын үеэр сэтгүүлчдэд хандан, нам доторх цэвэрлэгээг хийх болсон шалтгаанаа тайлбарлахдаа "Бид 1.4 тэрбум хүний ​​итгэлийг алдахаас илүүтэй, хэдэн мянган хүнийг гомдоохыг илүүд үзсэн" гэжээ. Энэ долоо хоногт Хятадын Коммунист Намын (ХКН) дээд албан тушаалтнуудын чуулган буюу "пленум" болсон. Таван жилийн хугацаанд нийт долоон удаа болдог энэхүү хурлын тав дахь удаагийн хуралдаан нь Хятадын түүхэнд хамгийн олон хоосон суудалтайгаар хуралдав.

Бээжин дэх Ардын их хурлын ордонд болсон уг хуралд ердөө 279 гишүүн оролцсон нь 2022 онд болсон намын их хурлаар сонгогдсон 376 гишүүнтэй харьцуулахад цөөрчээ. Энэ нь Ши Жиньпиний удирдлагын үед оролцогчдын тоо 300-аас доош буусан анхны тохиолдол боллоо. Ши Жиньпин 2012 онд эрх барьж эхэлснээсээ хойш авлигын эсрэг тэмцлийг өөрийн засаглалын гол тулгуур болгож, бүх шатны албан тушаалтнуудыг, тэр дундаа өөрт нь болон гэр бүлд нь ойр гэгддэг хүмүүсийг ч албан тушаалаас нь зайлуулж ирсэн юм.

Сүүлийн 14 жилийн хугацаанд олон сая албан тушаалтан сахилгын шийтгэл хүлээх, албан тушаалаасаа чөлөөлөгдөх эсвэл шоронд хоригдох зэрэг арга хэмжээнд өртжээ. Энэ долоо хоногт нэр дурдагдсан хүмүүсийн дунд өндөр цолтой генерал, Төв цэргийн зөвлөлийн дэд даргын албыг хашиж байсан (өөрөөр хэлбэл Ши Жиньпиний дараа орох цэргийн өндөр албан тушаалтай удирдагч) хүн багтсан байна.  

Сүүлийн жилүүдэд Ши Жиньпин Цэргийн төв зөвлөлийн (ЦТЗ) гишүүдээс өөрийгөө болон дэд даргаа хэвээр үлдээж, Ерөнхийлөгчийн авлигын эсрэг кампанит ажлыг удирдаж буй Жан Шэнминээс бусад бүх хүнийг албан тушаалаас нь зайлуулжээ. Энэ долоо хоногт албан тушаалаасаа чөлөөлөгдсөн 33 хүний ​​жагсаалтад Нэгдсэн штабын дарга асан Лю Жэньли ч багтсан байна. Шинжааны өндөр албан тушаалтан асан Ма нь Ши Жиньпиний ойрын хүрээллийн хүн гэж тооцогддог байсан бөгөөд тэрбээр Ши Жиньпиний эхнэр Пэн Лиюаньтай Шаньдун мужид өсөж торнисон гэдэг утгаараа дотно холбоотой байж болзошгүй гэж үздэг байв.

Жагсаалтад орсон хүмүүсийн олонх нь, тухайлбал Юу Ся, Лю, Ма нар энэ долоо хоногийн мэдэгдлээс өмнө аль хэдийн олон нийтийн өмнө албан тушаалаасаа чөлөөлөгдсөн байсан юм. Баасан гарагт Намын сахилга бат, хяналтын төв хорооны (CCDI) төлөөлөгч Фу Хай "Бид улс төр, эдийн засгийн асуудлууд хоорондоо сүлжилдсэн, төр болон бизнесийнхний хоорондох хуйвалдаан, мөн улс төрийн хүрээнд капитал (хөрөнгө мөнгө)-ийн нөлөө нэвтэрсэн асуудлуудыг шалгахад нэн тэргүүнд анхаарлаа хандуулах болно. Түүнчлэн бид авлигын шинэ хэлбэрүүд болон далд авлигыг нарийн шалгаж, анхан шатны түвшинд олон нийтэд хор хөнөөл учруулж буй зүй бус үйлдэл, авлигын асуудлыг тогтмол шийдвэрлэх болно" гэв. Мөн тус бүгд хуралдаанаар таван жилд нэг удаа болдог, 2027 оны хоёрдугаар хагаст товлогдсон Намын XXI их хурлын төлөвлөгөөг хэлэлцэн баталсан байна.

Олон шинжээчийн үзэж байгаагаар, Ши Жиньпиний авлигын эсрэг явуулж буй цэвэрлэгээ нь Намын их хуралд бэлтгэх үйл явц аж. Энэ хурлаар тэрбээр дөрөв дэх удаагаа сонгогдох төлөвтэй байгаа бөгөөд хэрэв ингэвэл тэрээр орчин үеийн Хятад улсыг үндэслэгч Мао Зэдунаас хойш хамгийн удаан хугацаанд төрийн эрх барьсан удирдагч болох юм. 2023 оны 03 дугаар сард эхэлсэн Ши Жиньпиний гурав дахь бүрэн эрхийн хугацаанд л гэхэд намын 51 гишүүнийг эгнээнээс нь хассан байна. Харьцуулбал, түүний хоёр дахь бүрэн эрхийн хугацаанд 35, харин анхны бүрэн эрхийн хугацаанд 51 гишүүн бус, ердөө 5 гишүүн хасагдаж байжээ. Энэхүү цэвэрлэгээний үеэр нэгэн чухал дэвшил гарсан нь Ши Жиньпиний Цэргийн төв зөвлөл (CMC)-д үлдсэн цорын ганц итгэлт хүн болох Шэнмин Хятадын Коммунист Намын (ХКН) дээд удирдах байгууллага болох Улс төрийн товчоонд (Политбюро) дэвшин орсон явдал юм. Түүний энэхүү томилгоо нь 1994 оноос хойш Намын их хурлаас гадуур Улс төрийн товчоонд хийгдсэн анхны томилгоо болж байна.

https://www.yahoo.com/news/world/articles/xi-expels-record-33-officials-104342532.html